餐廳-K11大都烤鴨

因為要幫親戚買表帶,所以又再去了K11.這次去了上次無去到的大都烤鴨.

去之前上網看看大家的評論,好像說點心不錯,餐前小食好貴.我點的是午市套餐.2人套餐有2款,既然店名叫烤鴨,當然要試試他們的鴨,所以選了$268的淮州套餐.

可能套餐多人點,本來以為會先上小食,結果先來的是湯羹,然後是津白同小籠包,再來才是小食.

湯不錯,味道不會太咸,鴨味不會太濃.

津白的上湯幾濃厚,菜也煮得很稔.小籠包都算皮薄，不過香港好多小籠包都唔錯，所以大家的要求都推高晒。

小食幾特別。第一口食下面那樣，以為鴨肝，不過好稔。都係媽咪醒，食出係磨菇。魚塊都唔錯，好厚肉。

好快炒麵同鴨架都上埋。炒麵有鴨肉絲，唔錯。

鴨架係最濃味的，我覺得配炒麵食過咸了。

 

茶水有普洱，烏龍茶同龍井可選。我們飲龍井，幾香。

埋單連茶錢加一，三百頭。我覺得可以接受，因為服務環境都幾好。

 

 

餐廳-K11霞小飛

今日想去K11幫表嫂買表帶,拉埋阿媽陪我.表帶要等查下有無貨,就想係K11食埋中午飯.客戶服務中心介紹去B2的霞小飛.

聽個名已經估到係食上海菜.係K11裡面算大眾化的選擇.所以坐位唔算好舒服.

我問一個男仔,廁所係邊,佢答出商場,不停轉左,聽完真係無言語.不過有幾個後生女仔服務就好細心.整體都算唔錯.午市有幾種選擇,$88麵餐,碟頭飯或小菜套餐(記憶中$248兩位).媽咪擔心小菜套餐食唔晒,所以點左2份麵餐.

麵餐雖然$88不過有4選1小食,4選1麵食,4選1點心,再有一杯豆漿.

小食我地點左雞絲粉皮同烤夫(唔記得點寫…),麵食叫左黃魚湯麵同擔擔麵,點心要小籠包同流沙香芋包.

小食唔錯,雞絲粉皮好少出錯,上檯時有點乾,不過撈撈汁就無事了.烤夫的汁好味.黃魚湯麵的魚好鯹,可惜了好濃厚的湯.擔擔麵本來唔錯,不過對我來講辣左的.小籠包可以,流沙包面上的紅唇有的令人無語…

埋單連茶錢每人$8再加一,共$211.

同場加演,中庭的百味草雪糕.原味$48,我覺得一般,不過幾多人食.

 

 

 

 

 

 

三生三世十里桃花

最近迷上左睇三生三世十里桃花，迷到唔止不停咁一次又一次咁睇電視劇，連搭地鐵都搏命睇電子書。我其實連漫畫都睇過下，不過畫得太低智，所以睇左２頁就無睇，照而家個樣，難保有日連漫畫我都忍住睇埋。

我估如果唔係睇電視先，我可能無咁迷，因為原著（似乎係網絡小說）主線係今世，然後插敘之前兩世，讀起來有Ｄ亂。電視版用順敘法，對我呢Ｄ一日可能瞄一兩眼o既人來講，容易記又易明。而且電視版女主角楊冪雖然我覺得佢個樣好…特別，不過演起女神仙幾有靈氣。男主角係趙又廷，佢演0既痞子英雄我就鍾意睇，係呢套戲裡面佢演年輕但性格老成到不得了的太子好到位。本來呢個太子得個５萬歲，比女主角細成９萬歲，好似應該係個後生Ｄo既靚仔演，好似電影版o既楊洋演好似外形更似。不過轉念一想，雖然比女主角細，但畢竟都有５萬歲而且太子性格超乎佢年齡地沈穩，外表老成Ｄ都講得通，趙３２歲演都合適。

故事係神魔之間o既愛恨情仇。我一向都鍾意聊齋個類o既神仙狐妖故意,女主角就係個狐狸精(!)男主角係九重天o既天族,老實講,故事係好老土,不過唔再係醜小鴨遇上王子個種,男女主角都係有身份有地位,門當戶對o既.而且佢地本身就有緣,只係行左條長路.雖然故事老土，不過因為結局好急速，所以搞到我好想知道電視結局之後係點.

電視劇基本上跟住原著拍,不過原著係由女主角第一身角度,電視劇係抽離的角度拍,所以補充左D細節例如男主角o既想法.

套戲o的衫真係好仙氣,好靚,唔似鬼佬個o的神魔戲,著得一係好少布,一係一條晚裝長裙.我本來就鍾意中國古裝,好似以前TVB個D古裝好靚,呢套戲好多演員古裝扮相都好好睇.

D景就好假,而且開始有熟口熟面的感覺.而且唔知點解堂堂太子個宮殿正門開係條好似後巷o既地方…

呢套戲最唔鍾意係另一對東華鳳九所佔篇幅太多,真係想剪左佢

本來呢班人又天君又上神,又好似操縱人間命數咁,以為係玉皇大帝o個類,睇完好似上面仲有一層…不過睇戲只為消磨時間,我都係唔好咁認真了 🙂

 

 

2017泰遊行之買

去泰國買野係必做的.我地去左幾度買野

Central World有蝴蝶袋專門店.不過我地無朋友特別要送,所以無買(其實係後來無時間去).另外Central World換錢比機場抵好多.機場換3.95,Central World有4.3.Big C個邊都有得換,大約4.2.

Siam Paragon超市聽講有折蟹肉,不過我地可能去得夜,見唔到.不過我家姐勁鍾意佢地個度D果仁舖面米通,79-99Bhatt一包,佢買左成10包.我縑佢熱氣買左2包俾同事食.Siam好似有好多野買,下次再去,可能要住Siam.

翟道翟JJ Market好大0既露天市場.我買左100Bhatt有4樽0既香油(經驗係唔好插晒佢俾0既樹葉等佢吸得慢D),送俾女仔,細細份又香噴噴.泰式銀包仔(細0既10Bhatt,大0既有隻象0既我地講完價80Bhatt有4個),我買左一堆放係屋企等阿媽派俾人,結果佢看更又派,對面個印印又派,派得好開心.大象手袋,800Bhatt 2個,阿媽家姐一人一個.新鮮芒果干,140Bhatt一包.小老闆紫菜,100Bhatt一包,買3送1.藥品,我有買不過好似Big C個層間藥店平D.我買左條繡花手繪半截裙,講完價320Bhatt，真係抵，花園街都唔得.我地又係度試腳底按摩,200Bhatt20分鐘,未做過平平地試下自己鍾唔鍾意先.做完隻腳真係輕左.呢度可能早D去好D,人少D又可以講下價.

Big C買公仔麵,魚露,生果小老闆,百力支都好平.我今次無食到青咖哩買左包青咖哩公仔麵,50Bhatt6包,麵細D不過青咖哩好味.我買左盒花花型0既餅(?)俾F做手信,好彩佢話未見過.

Big C同層有間藥店,價錢都幾平.不過我真係唔知買咩藥,虎標平時都無用,買左D蜈蚣丸話醫咳(家姐食左話無效),搽肌肉痛0既膏,阿媽話唔錯.蚊膏35Bhatt一盒.

我地酒店對面有間迷你Boots.我無搵到有咩買,只係買左盒粉餅.買佢因為我剛好要買粉餅佢又有特價108Bhatt美白版(另有自然版不過賣晒),係機場Boots賣正價425Bhatt.

係水門市場附近有間Festival Mall,個度有2個MALL,其中一間D野精緻D,我同家姐買左條連身裙,700Bhatt兩條.仲搵到件無袖衫,家姐激讚話返屋又得去街又得,不過要350Bhatt無價講,我最後無買到.

我地今次換左2500港紙,洗剩差不多2000Bhatt.另外Uber同Big C係用信用卡0既

 

 

 

 

 

2017泰遊行之行

今次出行因為媽咪唔方便上落,大部份都係行路同坐的士.

一出機場聽左達人教坐的士去酒店,講好價就上.機場的士站有分短途定正常或大車,難度系數唔高.不過插曲一係由出境大堂到地下搭的士個段路有一個好似過山車咁0既扶手電梯,我阿媽搭到猛話驚.插曲二的士佬可能口音問題我聽到佢話400Bhatt但落車佢話係500,達人話500Bhatt或以下都屬正常所以照俾.

另一達人教話曼谷搭Uber好平,我為左方便搵路,出發前搵F係旺角金魚街買左張上網卡,港紙40可以用7日4G網絡(首2GB係4G網速,之後慢D).我去翟道翟個程試下叫Uber,坐左百零Bhatt,大約廿幾蚊港紙,勁平.返酒店因為怕唔知點約上車地點,我地搭普通的士300Bhatt.不過臨走前一晚臨時想去Waterfront夜市,又膽粗粗叫Uber去,來左架香車美人.架車真係香噴噴架,個司機亦都真係靚女,講野又溫柔.不過唔知係佢唔識路定係撞正塞車行邊都塞,坐左成個鐘都未去到,後來個段我同家姐計住時,個紅燈9分鐘先轉一次燈,每次過4架車左右(我地後來懷疑係因為要讓D電單車行咁D先可以行).坐到成7點幾都未到,我地決定叫佢返Big C放低我地.呢程就冤枉咯,成4百幾Bhatt,慘在去唔到嘛(我而家都唔敢話俾屋企人聽幾錢).所以結論係Uber確係平,不過司機好似唔係好識路,而且溝通有困難(車我地去翟道翟個位全程無同我講野,美人因為同車時間長,靠Google translate溝通).

的士感覺上專業D,講好價,佢會用最快路線送你到目的地,而且我係翟道翟返酒店個司機英文好好,仲話我地知佢一日要俾700Bhatt俾公司,我地仲笑佢走2轉我地呢D就差唔多可以返屋企休息.

去到曼谷又點可以唔搭Tutu.我同家姐第一晚放低媽咪係酒店休息去Siam Paragon想買折好０既蟹肉。結果試食手信同買外賣耐左，為怕媽咪肚餓我地搭Ｔｕｔｕ。不過無經驗未講價就上左車，結果個程５分鐘０既Ｔｕｔｕ要成２００Ｂｈａｔｔ．

至於行路,不得不又讚下我地間酒店位置好.行去水門都可以行天橋去.（不過我地無去到水門市場,轉左去一間專賣衫既商場.個度的衫都唔算好貴,我同家姐都買左條裙）

2017泰遊行之食

我本身都幾鍾意食泰國野,聽講曼谷食野又平又好食,本來對呢次期望好高,結果有些失望.主要原因我相信係因為我阿媽同家姐.

首先我阿媽唔行得,成日話唔想出去食叫我地買返酒店俾佢食,變左選擇少左好多.而且唔知點解去到泰國佢話要食濕濕地但唔要魚旦河…搞到我地差唔多要買韓國或者日本野佢食.

跟住我家姐話自己有糖尿,食咩都話甜,搞到好多時D食物都係我食晒,所以後來都唔敢多叫.

加上唔知係咪我地酒店近四面佛,係遊客區,食野唔係想像中平.我地第一日去Central World一間泰菜館食,一個椰青都要95Bhatt,差不多無食咩都要400Bhatt.係Central World外面小食檔,我阿媽睇到有榴槤話要食,我家姐要左一份好新鮮0既金枕頭,成百蚊港銀,味道係唔錯不過一D都唔平咯.

後來我地發現Big C樓上有美食廣場,50Bhatt有交易,而且咁近我阿媽都敢行去,所以日日都係個度食…個度食野要先買張卡,金額由你決定,用唔完可以退番俾你,無手續費,不過要俾現金.我有次放左400Bhatt諗住實有淨,結果要補錢.

雖然我都堅持食左豬手飯,冬陰功湯河,芒果糯米飯(呢樣係我家姐話要食,結果一如所料大部份落左我肚),椰子雪糕.不過飲唔到泰式奶茶,食唔到青咖哩,又無食過海鮮,沮喪…

2017泰遊行之住 – Holiday Inn Bangkok

已有超過１０年無去過泰國了。最近難得媽咪對曼谷表示興趣，就去了次曼谷４日３夜自遊行。

我對曼谷無認識，決定了去曼谷後我花了兩日係國泰假期上搵酒店。本來想訂水門個邊，後來請教泰遊達人Ｆ，換了四面佛對面的假日酒店(聽講曼谷有5間假日,我地呢間係洲際對面)。

訂好了套票家姐先話可以一齊去。只好加錢換大房同加床，每日要俾多成6百蚊港紙。本來覺得貴左好唔開心,後來反而覺得好彩加床咋.

首先因為我係IHG會員又加床，酒店送3個人每日自助早餐(本身IHG會員已經送wifi).好彩有送早餐,假日話晒係4星級酒店,自助早餐種類好多,每日都梗有一款啱我媽咪口味,如果唔係日日搵早餐俾佢食都幾煩.結果佢好鍾意個度的豬肉粥同埋即煮青菜湯河(本來係我點來食0既,結果佢愛上左,貪佢夠清),日日食得好開心.同阿媽出去玩就係希望佢開心,難得早餐環節上已經達標,我都好開心.

另外酒店原本0既床好高,我同家姐都要用爬0既來上床,對媽咪難度更高.好彩俾錢加0既床好矮,啱晒媽咪,本來我怕張摺床佢地瞓得唔舒服,結果媽咪瞓得仲開心.

而且間房升級左,真係闊好多,3個人都好鬆動.Like!

酒店大部份員工都好友善,成日都笑臉迎人.有日我係大堂問野,突然聽到大門個度有聲,回頭一望原來的Bell Boy係度鼓勵我阿媽上樓梯,無論佢地係咪為左小費,呢份心思都好令人感動.所以我都學識左俾小費(當然有原因先俾).而且我發現你俾50Bhatt(大約10幾蚊港紙)小費佢地已經好開心,洗少小錢就可以令人開心自己開心,真係好.

酒店地點好好,就係BTS站旁邊(雖然我地一次都無坐過),去Big C超級市場行5分鐘左右就到,天橋都唔使過.去Central World就煩些,要行天橋.去Central World個程要落樓梯,我阿媽上落唔方便,所以去左一次就無再去了.去水門市場都可以行去.

要話唔好就係叫Uber比較麻煩,的司機好似唔係好知呢度.