死鬼iPhone

最近我終於抵唔住手將我部iPhone4升級到iOS6.

我未做前有同事同我講佢死都唔升級以免出事.我想新iOS都出左一段時間,應該無事掛,所以無在意,結果真係出事.最慘係我出完事先有同事好具體咁同我講佢好多朋友升級時都死機,如果佢早的同我講我一定唔會做.

我一直都唔鍾意iPhone,因為佢好多野都好唔方便.好似玩Whats App一定要玩既smily都要另外加App先做到.又或者我已經係部機度整好首鈴聲都要經一經iTune先可以係部機度用番;又例如好多用法要睇天書先知,等等.我買佢純粹貪佢影相靚,如果唔係,我真係用番婆仔機好過.

可能部機都知我先天唔鍾意佢,所以我同佢一直唔係好夾.上次升級到iOS5已經搞到我以為突然唔見晒的相而好唔開心,誰知幾日後,的相突然又出番黎,所以我一眾同事到而家都因此而笑我.

今次我見公司電腦部出通知話可以繼續用GOOD係新iOS睇公司電郵我先夠膽升級,結果都係衰左.其實係升級前,我已經將手機既野傳左上雲端,而iPhone都有將的文件過落我部電腦,但係唔知咩原因,中間出左事,部機自動彈句野話要我去番出廠狀態,我係無選擇之下唯有照做,結果…個陣我真係有想將Steve Jobs係墓度挖出來的感覺.

雖然我到而家都唔明點解我的相唔係全部傳晒上雲端…萬幸既係App Store有記低我裝過咩App,而家正逐樣裝番.

不過如果阿Q的睇件事,今次其實俾機會我重新睇下有咩App係要留既,咁樣部機唔使裝埋晒的唔會用既野.

Advertisements

1209 美國行- 酒店篇

凡事都有正反兩面,我而家份新工都唔例外.So far好既係我返工無一個月,就有得去美國R&D總部受訓,而且仲係去2個星期.

我咁大個女從未去過美國或者美洲,而且我估呢世都係得呢次了,咁啱上完training好近中秋國慶假期,所以自己俾錢回程時係NY停2晚.美國咁多地方我去NY因為覺得自由女神像最有代表性.

先講我係STL既酒店.基本上公司所有長工都去過美國受訓,分別只係去邊.我一早聽去過STL既同事講公司附近好荒蕪,無啖好食.我其實唔係一個鐘意”泡”既人,所以悶既地方對我問題不大,只要俾我上網就得了,而出差上網係天經地義既,所以我並唔擔心.不過聽講離公司最近既酒店都要行一段路(因為我唔識開車).我同美國同事講我唔識開車,佢地介紹我住另一個town,而且”白雪雪”仲好好人話可以日日車我返工返酒店.所以我係STL住係一間叫Drury Plaza既酒店.

酒店係一個大mall前面,同事話我可以係個度搵野食.上網睇資料間酒店只有3,4星不過評語唔錯:話員工好友善,早餐免費而且有熱香餅,下晝仲有免費酒水同小食.我去到發現間房好大(因為我訂時無晒大床房,所以我間係雙床既).可能因為只有3星既關係,浴室真係好簡單.浴室洗手位連門都無,一入房就見到晒.而且牙刷水杯欠奉.不過唔知點解反而有個咖啡機係度(酒店大堂有免費汽水,咖啡奶茶任飲).員工確係好友善.個免費早餐只有少過10樣食物,不過味道都可以.最開心係有熱香餅仲有得玩格仔餅.最驚喜係下晝既免費酒水同小食.我有幾日食完小食就返房瞓,都唔使食晚餐.

 

酒店附近個mall好大,我日日去食都未食厭.不過去得最多既係Cheesecake Factory.我開頭真係以為呢間係專門整芝士餅既工廠,後來先知原來係間餐廳.Main大約USD20,最吸引仲係芝士餅,有好多種選擇.

講完STL,跟住講NY.NY酒店同STL比,無論價錢或質素真係天壤之別.除非你想同人共用浴廁或者房,如果唔係最平既酒店都要HKD2000一晚.我因為帶住公司電腦,而且唔想同人分房或浴廁,所以左搵右搵(真係好辛苦)搵左間酒店叫Hotel at Time Square.個名好明顯,係時代廣場.返來睇返房價連稅都2,3千一晚.之所以住佢因為地點而且有免費早餐同wifi.睇網上介紹,係NY食個早餐都唔平.至於上網,我對NY唔熟,好可能要上網查景點資料.所以雖然唔平都住.間房我估算唔細.張床同床上用品好舒服,搞到最後一日我都留係房休息唔出街.浴室又係無牙刷水杯,不過據網民講套洗頭水什麼的好好,所以我帶走了.呢度既wifi無Drury快,不過叫做可以.早餐同STL比,仲簡單.有24小時免費咖啡茶供應(出門飲番杯唔錯架).佢地點唔錯,行去時代廣場或者地鐵站大約行十幾分鐘左右.員工態度就…反而門口個好似保安比較友善.

新工2個月感想

唔經唔覺,我份新工都已經做左2個月.唔覺因為自從美國返來之後一直都很忙.每日好多conf call.多都算了,仲要時間又有早又有夜,好似今日我下晝2點有一個同大陸同事既CALL,今晚本來9:30pm都有不過好彩今日取消左.然後半夜12點一個,”聽日”7:30am仲有.而且咁既情形唔係一日半日而係日日如是,只除左星期一因為美國差唔多我地星期二先開工.有夜因為要同我美國同事傾project,有早因為而家有個合作緊既vendor係澳洲.本來半夜既call我拒絕左,不過美國同事話”Oh,你會miss左好多update”,咁就唯有照take咯.

我真正開工其實無2個月,已經有頂唔順既感覺.”琴晚”同dotted老闆做update call個時,同佢呻下太多call了,以為大家都女人,佢會叫我以家庭為重,保重身體bla bla bla啦.點知佢話”我地係global company所以工作時間唔定架”.”你咁大個人自己安排咯.如果你日頭遲返,我無所謂架”.聽完我都收聲,無謂講落去了.大姐,唔係話夜晚有call日頭遲返就得.日日又早又夜咁做好傷身架.我出份糧唔係賣命.而且我日頭唔係坐係度無野做,我係杜拜既”烏卒卒”同事都有野我做架,我而家連週末都抽一日出來做野,平時返工仲想遲返?!

同舊team mate呻,佢話你轉team都係想要perm,而家”求仁得仁”仲投訴咩啫,咁我唯有又收聲.

老實講我真係想辭職唔做了.不過睇到好似個市好差,幾個朋友或者朋友妻都話未搵到,自己又無咩識又有父母要養,所以都係想下好咯.再做下希望遲下上左手會好轉啦.