2012自身大事回顧

見到電視台有香港大事回顧又有國際大事回顧,等我都反省下做下回顧.

先講工作,今年有幸可以轉長工.因為唔係做番我一直以來做的晶片,好多人都話浪費左我以前的經驗,不過我唔介意.因為我知道公司係香港好少tech位,難得我新上司肯要我,都唔敢話加人工升職.轉左之後因為又要同中東客溝通,又要同美國同事開會,工作時間長左好多,不過我呢班新同事都好友善,好幫我.雖然辛苦,不過我都明白新產品係咁.

愛情方面,仍然交白卷.本來係網上識左個日本人,可惜最後都傾唔埋(釣魚台係我地中國既!),睇來網上都係唔得.唯有繼續努力搵下其他方法啦!

身體方面,自從轉team之後,壓力好大,所以身體都唔太好,而且好多時食完飯就坐低傾電話會議,肥左好多(又要買衫褲).我最近見轉左長工,公司又續左租,所以簽左一個gym的3年約,2013打算開始做下運動.

屋企方面,因為澳元高企,阿哥俾公司炒左,而家都未搵到工.所以最近返港多左.都好,因為佢可以幫下照顧阿媽.至於父母,我老豆成日話自己唔舒服唔出街,我都無理佢.阿媽就真係睇住佢身體差左,本來好想請個賓賓幫下佢手,但佢又唔鍾意屋企多個人係度住(其實我都唔鍾意),所以一直唔成事.唯有有時間我就幫下手,不過見佢明明好想瞓多陣,為左我地都撐起身煮野俾我地食,真係明白到母愛個種偉大法.

旅行方面,我去左2個新地方:新彊仲有美國.而且係轉工中間帶父母去左一轉澳洲.出差方面只係5月同12月去星洲,9月去美國2星期受訓,8月去左上海.新部門好窮,睇來有排都唔使點出差(今年都係因為啱啱轉部門先可以去美國,而且上司生仔無出差有錢剩先可以去星洲).可能老了,我而家都唔多願出差,所以我估應該無咩問題.

今年可能因為真係老了,覺得好多事睇法都唔同左,開始化了,學識由唔同角度去睇件事,開始比較正面去處理事.

對2013年,希望工作快的上手.希望可以有多的自己時間學下其他野,而家搵緊有咩學,有想過學中醫,不過我份人通常做事只得3分鐘熱度,都係睇下點先.

1207 – 新彊行

趕工在2012年將今年的重要事記番低(雖然都隔左一段時間,記憶有的淡左了)

我一直都對少數民族的事物好有興趣,可能因此對2個地方特有好感,佢地就係新彊和雲南.雲南係我心中一直好似仙境咁靚,的人好純樸,但係聽人講個度而家完全唔係個回事.為左唔好破壞係我心中的美好形象,我一直都唔敢去個度.新彊,因為我姨丈有親戚住個度,佢間唔中會去探親,而且都有叫我地一齊去.以前每次講跟佢地去,佢就話要去2個禮拜,我地打工的好難請咁長假,所以一直都無跟去.

今年阿姨再提舊事而且話我地可以走先,我阿媽話點都想去一次,所以今年我請了7日假跟阿姨姨丈一齊去新彊烏魯木齊探親(阿爸話身體唔好,所以無去).香港去新彊係無直航的,結果我媽選去程經四川,番經北京.

其實係新彊的係我姨丈大哥一家.我細個時,姨丈大哥病左去過廣州醫所以我地有見過,不過我對佢地已經無晒印象了.姨丈大哥係一早入彊解放新彊的人.我呢輩對呢的事無認識,並唔覺得有咩.不過係去玩的時候在大山大嶺裡面睇到公路起得又靚又闊,跟住聽到話好多解放軍入彊幫手起路水土不服,吃左好多苦,有好多仲客死異鄉,想想班解放軍真係偉大.好似大伯,佢本身只係一個農民,細個無讀過書,解放完新彊就留低幫手當地建設.本來我想佢無功都有勞,佢地一定係當地做大官住大屋.點知去到見到伯娘(阿媽叫我咁叫)所住的屋並不太好,甚至可以講普通到唔恨,佢仔女(大伯已經過左身)亦都只係普通打工仔,咩好處都無(佢其中一個女仲要住貧民區咁的地區).後來小紅姐話我知唔係政府對佢地衰而係大伯拒絕晒所有好處.最有印象係小紅姐話有次當地政府有的喜慶事請大伯去當時一間好高檔的酒店食飯(我都有見過間酒店,而家已經沒落了),當時小紅仲細又從未去過咁靚的酒店,所以一早係屋企叫伯娘幫佢打扮好想跟埋去,點知大伯返到屋企點都唔俾佢去,因為唔想仔女因為佢有出過力就攞好處.當時我就想食餐飯啫,邊有講到拿好處咁嚴重呀,不過正因為佢咁清廉,文革時無整佢地,因為真係搵唔到把柄.我聽完真係好感動,覺得當年的共產黨人真係唔簡單,唔怪得佢地可以打贏有美國撐腰的蔣介石.

講番新彊行,當地而家其實先進到不得了,有輕鐵(一種走特定路線的巴士),有好靚的百貨公司.到處好多漢人,不過當我地去到有名的市集買手信就見到好多當地人仲有周圍都有荷槍(唔知係咪實彈?)的軍人,小紅話因為早排南部動亂所以當地人多的地方就會見到有軍人,有間購物中心仲關左.

除左好繁榮的烏魯木齊,當地旅遊業發展得好好.我有跟當地團去左天山/天池,吐魯番/火焰山.天山真係好靚,我地去吐魯番個日好衰唔衰熱到成45度,當我地去到一個古城,一落旅遊巴我的皮膚就即刻晒到紅晒.去完吐魯番一日我自覺都輕左起碼2公斤!不過當地的景色真係同江南水鄉好唔同.當你望住一望無際的平原時,心情即刻唔同,好似好多事都只係小事跟本唔值得太緊張.

伯娘一家真係好熱情,全家日日都陪我地出入,又煮各種唔同的美食俾我食:手抓飯,串燒,拉麵,可惜無帶我地去掃街,所以大家係旅遊節目見到的美食我都沒食過 😦

1209美國行- NY

繼續補寫我美國之行

去完STL,因為時近中秋同國慶假,我見難得去到美國,所以明知洗費貴都選擇自費係返港前係NY留2晚.

選NY唔選芝加哥,因為覺得NY有自由女神像,華爾街,時代廣場等名勝.而且我聽講NY秋天好靚,好想去看看紅葉.

未去NY前,聽講我偶像Jun今年都去過一次NY係睇百老匯歌劇.Jun我就無幸見到,不過都想去睇下佢好鐘意的歌劇.上網睇睇仲做緊的有Lion King, Chigaco, 歌聲魅影,等等.Lion King我覺得係俾小朋友睇,我大拿拿千幾銀睇小朋友戲條氣唔順.咁多戲我比較有興趣Chicago,所以上網睇睇d票價.嘩,一睇要百幾美金…我又唔捨得了,畢竟睇左Jun又唔會多謝我,我又唔會肥左又靚左,所以本來打消念頭了.後來”白雪雪”同事話好值得睇而且難得我咁貴都住係百老匯附近好應該睇,所以我膽粗粗上網搵平價票.又真係俾我搵到!85美金坐第2行左邊!!!!好幸運買到平價百老匯歌劇票差唔多一半價錢咁好位置唔睇對自己唔住,所以我就係第一晚睇左(因為橫掂呢日大部份時間花係交通上,都做唔到咩)!結果少少失望,因為個台無想像中豪華,班底無想像中大,不過演員真係勁專業勁叻!諗諗而家係香港睇場外國演員做的舞台劇都要成千銀(所以我都無睇過),係百老匯睇一流的歌劇都係差不多價錢,我又叫做親身經歷過,咁樣諗都係值0既.

唔知係咪時候唔夾,此行紅葉完全睇唔到,不過自由女神像我就睇到.據多方資料所講,去自由女神個島要坐船,而且要排好多個鐘.我雖然話留2晚其實真正可以玩的只有1日,所以時間好寶貴,唔想浪費半日排隊係自由女神像.係我多方查探之下發現原來有一架船可以離遠睇女神像遠眺自由女神像(我又唔係想摸佢無所謂啦),無咁多人排隊,時間唔需要咁多又好安排之餘仲要係免費!!!咁正我當然就選佢啦.呢隻船其實係來往某2個地方(唔記得邊2個地方)的渡輪,係為了方便當地人返工放工而設的,所以免費(!!!),而且好早就開船又密,每30分鐘一班,船程都係30分鐘.

我一早去坐個來回都係1個鐘仲有大把時間去華爾街,第5大道,時代廣場,中央公園,後來我連唐人街都去埋!

華爾街我無咩興趣,純粹係落船見一大班人向一個方向行,通常一定有d原因,我見有時間咪跟,原來班人去個隻牛度影相.我望了兩眼真係無興趣,就去中央公園.中途見有時間過站都要另外俾錢坐回頭車去唐人街睇睇.唐人街又真係好多人唐人.我行過一個公園見坐滿晒老人仲要放好大聲粵曲.我係OZ好鐘意食越南菜,覺得香港都無咁好食,係唐人街見到一間越南菜館好多人,我又走入去叫碗粉食,不過都係OZ好味得多.係唐人街行下買左一埋超平的明信片,見無咩特別就坐subway去中央公園.可惜去到天公不造美,落雨!!!我睇旅遊書話中央公園的指示牌奇少,公園又大,好易入左去好耐先出到來.我實地睇過真係無咩指示牌,行左一陣見到好多馬車搵生意但見唔到有咩有趣的,就離開了.出了公園不遠見到APPLE store,我從來都唔係佢粉絲,入到去掃2下IPhone5真身都無興趣就走了.第5大道全部賣貴0野我又無錢又無0野想買,所以行左陣就無興趣了.去左呢幾個地方之後,真係無力再行,最後死撑返時代廣場NY時代廣場 買埋朱古力做手信就返酒店休息結束我係NY的遊歷.
最後一日,因為前一日行得太多,無力再去其他地方,只係留係酒店上網(間酒店包上網,讚)搵最平去機場的方法(因為NY全自費).到時候我就拖住個大箱係時代廣場搵地鐵去機場.問地鐵站個職員,完全聽唔明佢講咩,唯有根據我係網上資料幫張地鐵飛加到啱啱好錢就去坐地鐵.去到站台又驚搭錯車又問人,結果人地講左另一條路.我見一個阿姐(其實可能佢同我差唔多年紀)都似去機場個樣又幾友善,就再問佢.一問之下佢真係去機場不過都係唔多識路,不過佢好樂意同我一齊摸,結果我地跟住佢的路線順利去到甘迺迪機場

講左我係NY的經歷,講下感覺.未去NY前,我對NY印象麻麻,可能因為睇得多Hollywood電影,一直覺得NY係罪惡城市.”白雪雪”又教我去到講野唔好望人地雙眼(?)行路保持低頭,嚇到我死死下灰暗的NY,令人印象不佳.老實講我自問都出差去過不少地方,慢慢都適應出差無初初咁驚,但係今次真係驚.加上一落機天色灰暗,見到一眾人等拾金都唔笑,印象真係同STL差好遠(我係STL大部份時間都係藍天白雲,天色晴朗).好彩玩完因為方方面面都幾順利,印象先唔會變得更差.

Aside

1209美國行 – STL

轉了長工後,仲忙過以前,所以積了好多博文未寫,希望可以趕在新年前寫完.

先補寫美國之旅,因為可能是我今生唯一一次,點都要記下感想.

我今年9月的美國之旅嚴格來講去過3個城市,不過芝加哥只是過境性質就唔寫了;STL雖然悶,不過我係個度留得最長時間,一定要寫.

未出發前,我問了好多同事有咩好玩,結果全部人都口徑一致叫我去睇拱門.我開始仲好天真以為拱門內有其他,點知問來問去都話無.結果我放棄了,改為問仲有咩其他好玩.問了好多人都答唔出,只有”大哥”憑記憶話我知個度有個動物園好出名.我未死心,去圖書館借埋有關美國的旅行書,先至信STL真是一個乏善可陳的地方.

可能我無期望,結果去到比我想像中好.環境好清潔,綠草如茵.我見到當地人的屋與屋之間係無圍欄隔住的S的家,呢種情形我在OZ都未見過,所以我估當地人是好友善的.另一個令我覺得當地人友善的原因係我住的酒店.個度的員工真是又友善又主動.有一天我去食早餐,收枱的伯伯見到我件衫有隻蝴蝶,以為我好鐘意蝴蝶,介紹我去當地的動物園,話個度的蝴蝶好多好靚.平時出外,我絕少去動物園,不過在如此沮喪的地方,點都好過坐係酒店過週末.而且佢有度好:免費入場!

DSCN7183

不怕人的蝴蝶

根據網上資料,STL的動物園在美國係前三名內.

去到之後發現真係名不虛傳,個動物園真係好大好多野睇.我係個度見到好多我從未見過的蛇(!),蝴蝶同動物.搞到我返酒店睇返的相時見到全部係蛇同蝴蝶,好似影生物教科書咁.如果你由我的相大部份係蛇估個動物園淨係得蛇你就錯了,只係因為我淨係睇蛇都睇左半日,而蛇只係其中一個展館,仲有好多,所以我睇完蛇之後就唔再咁笨,個個館都睇而係選擇性地睇.所以我之後睇左企鵝同蝴蝶.

個蝴蝶館又係有名大同多蝴蝶,入去一睇又真係好多不同品種的蝴蝶,而且唔怕人,你行列好埋蝴蝶都若無其事停係度.

我都去睇我好鐘意的海狗,不過好多人睇要排隊.當我死死地氣排隊之際,突然條隊去得好快,原來我去得唔係時候,排到我個陣,海狗去左食飯,淨係睇到佢地住的水族館所以條隊去得飛快.後來我唔憤氣,俾錢睇海狗表演.結果呢個係我睇過有史以來最搵笨的海狗表演,因為的海狗除了係個池度從左游去右,又由右游去左之外,就淨係擺擺POSE同小朋友影相可能我俾海洋公園的海狗縱慣左,呢d我唔當咩咁特別.不過後來我諗諗,成個動物園咁大咁多0野睇都係免費,海狗收我少少錢,計落都係勁抵海狗表演要美金4元.

我真係好俾心機發掘STL好玩的地方,好彩皇天不負有心人,俾我搵到原來STL有一個全美最大的日本花園.我諗日本花園點都好睇過拱門呀,所以打算週末分別去動物園同日本花園.後來我無意中同同事講起,咁啱S原來好鐘意植物,仲係鐘意到全家買左植物園全年入場卷個隻,所以佢就話帶我去睇拱門同埋植物園.

由於拱門入場要搜身(都唔知為咩要搜,要炸都唔炸佢個拱門啦)時間難預,於是一早我地先去睇拱門.好彩好多人都同我一樣想法認為拱門不值一看,所以我去個日人流唔多,好快就過完X光入去拱門底部.S問我要唔要坐密封式升降機上頂,咁講法點都估到佢唔想上,我本身根本無打算睇拱門,對佢的興趣可想而知,當然唔上,就係下面”混吉”一陣就去食飯.個拱門又真係好高大,不過唔知起黎做咩

食完飯就去植物園.去到日本花園完全唔掂,無日本園林個種感覺,一味得個大(人地都係全美最大唔係最靚)字,難為佢仲收我USD8入場費STL植物園一景.

我睇左陣就話腳軟要返酒店休息.我估S都估唔到我咁快就走,見時間仲旱,唯有帶我去食當地出名的一隻雪糕.

雖然STL無咩景點,不過可能就因為係鄉下關係,環境真係好靚由公司外望,綠草如茵,而且樣樣都好大好舒服,唔會好侷促.