電影 – 一代宗師

知道呢部戲拍左好長時間,長到人地雙胞胎第2集都落埋畫先到佢公佈張海報係咩樣.

雖然故事都係講同一個人,不過”宇宙最強”個部我完全無睇過亦都無咩想睇.老實講打打殺殺我從來都唔係特別鍾意,呢次因為有梁朝偉,所以有興趣知道到底咩故事會拍到改變埋演員本人.

我睇既係內地DVD版,所以講普通話既.不過本戲大部份演員都係講普通話既,而配梁把聲都幾好聽,感覺可以表達得好好.

睇完套戲感覺鏡頭好靚,個的雨中既倒影,蚊香既輕煙,漫天既雪花等等都拍得好有美感.

梁朝偉雖然係戲中已經唔似以前咁”醒”,塊面有歲月既印記,但咁又剛好配合到主角葉問係經歷滄桑後沈澱而成既大氣.我去過佛山祖廟見過葉問張相,係戲裡面某的場景,使我覺得梁真係有幾分似葉問.(有時想想演戲淨得勤力似乎無用,一係你要有天份一係要有悟性,所以呢個角色劉華影唔黎.)

睇到有人話梁雖然係主角但係戲份唔係最多,反而唔及章子怡演既宮二.我都有同感.唔知係剪得太多所以變成咁定係王大導想側寫葉問成為宗師既經過.不過章子怡我一向都幾鍾意,覺得佢生得好有英氣又聰明,扮演既角色可柔可剛,可塑性高.佢既私生活我從來無興趣.不過今次佢本人既花邊新聞好似意外地配合戲中宮二一生計較輸贏的性格.令我覺得呢個角色真係不作他人想.

成套戲唔算打得太勁,亦無黃飛鴻個的打外國人為國爭光既橋段,不過有好多發人深省既台詞.我估葉師傅本身並非普通一介武夫,佢係經歷過好多又見過武林中好多人既事跡(例如宮二,馬三)後,參透到好多人生道理而成為宗師既.一代宗師講既唔係佢武術上既厲害而係為人處事既修為.起碼我都參透到武功幾好既人其實係戰亂既時候都係無用既,君不見葉師傅為生活要將練功用既木樁斬左佢?

套戲比較莫名其妙既係張震個幾段.好似完全唔關事咁,真係剪左佢留番時間講多的葉師傅既事好過.不過聽講張震為左拍呢部戲練武練到可以攞武術比賽冠軍.可能因為咁,王導演唔想剪晒人地既戲啦.

Advertisements