三生三世十里桃花

最近迷上左睇三生三世十里桃花,迷到唔止不停咁一次又一次咁睇電視劇,連搭地鐵都搏命睇電子書。我其實連漫畫都睇過下,不過畫得太低智,所以睇左2頁就無睇,照而家個樣,難保有日連漫畫我都忍住睇埋。

我估如果唔係睇電視先,我可能無咁迷,因為原著(似乎係網絡小說)主線係今世,然後插敘之前兩世,讀起來有D亂。電視版用順敘法,對我呢D一日可能瞄一兩眼o既人來講,容易記又易明。而且電視版女主角楊冪雖然我覺得佢個樣好…特別,不過演起女神仙幾有靈氣。男主角係趙又廷,佢演0既痞子英雄我就鍾意睇,係呢套戲裡面佢演年輕但性格老成到不得了的太子好到位。本來呢個太子得個5萬歲,比女主角細成9萬歲,好似應該係個後生Do既靚仔演,好似電影版o既楊洋演好似外形更似。不過轉念一想,雖然比女主角細,但畢竟都有5萬歲而且太子性格超乎佢年齡地沈穩,外表老成D都講得通,趙32歲演都合適。

故事係神魔之間o既愛恨情仇。我一向都鍾意聊齋個類o既神仙狐妖故意,女主角就係個狐狸精(!)男主角係九重天o既天族,老實講,故事係好老土,不過唔再係醜小鴨遇上王子個種,男女主角都係有身份有地位,門當戶對o既.而且佢地本身就有緣,只係行左條長路.雖然故事老土,不過因為結局好急速,所以搞到我好想知道電視結局之後係點.

電視劇基本上跟住原著拍,不過原著係由女主角第一身角度,電視劇係抽離的角度拍,所以補充左D細節例如男主角o既想法.

套戲o的衫真係好仙氣,好靚,唔似鬼佬個o的神魔戲,著得一係好少布,一係一條晚裝長裙.我本來就鍾意中國古裝,好似以前TVB個D古裝好靚,呢套戲好多演員古裝扮相都好好睇.

D景就好假,而且開始有熟口熟面的感覺.而且唔知點解堂堂太子個宮殿正門開係條好似後巷o既地方…

呢套戲最唔鍾意係另一對東華鳳九所佔篇幅太多,真係想剪左佢

本來呢班人又天君又上神,又好似操縱人間命數咁,以為係玉皇大帝o個類,睇完好似上面仲有一層…不過睇戲只為消磨時間,我都係唔好咁認真了 🙂

 

 

Advertisements