電影 — 出貓特攻隊Bad Genius

這是一部泰國電影。

內容是說一個學霸由在學校出貓出到衝出國際。開始女主角(即學霸1號)只是想幫一個女同學,後來這同學的男朋友也要求她幫,再發展到他們擴大規模的出貓,最後還在考報美國大學的公開試STIC(我只知托福...)裡面出貓。當然電影要帶出正面訊息,所以女主角最後覺悟並且自首。

看介紹,故事是根據真實事件拍成的。在我印象中泰國人都很純,我很好奇他們是怎樣出貓出到拍成電影的。看完電影,我對女主角出貓的方法真是"嘆為觀止",沒想到有人居然這樣出貓的,真是一改我對泰國人的印象!後來上網查了,原來原型故事是中國還是韓國人幹的。

不過這戲真的不錯,難怪在本土票房很好.故事有創意又溫情而且帶出了泰國的國情.劇情明快緊湊有條理,把女主角的心路歷程說的很清楚.戲裡有些部份是倒敘但不亂.鏡頭拍出校園片的溫暖和朝氣.女主角不算漂亮,但配角很漂亮悅目.

 

Advertisements

2017京都行

今年姨娚女11月結婚,阿哥回來”飲”.他之前每次返來,因時間關係大都只會返大陸見見親戚,但我知其實他很喜歡旅行的.上次,我們和他去台北度新年.今次我問他想去哪裡,他說想去京都看寺廟.和媽媽說起,她也有興趣,所以我們一行3人11月6-9日去京都自遊行.

這次因為媽媽也去而且阿哥號稱他想去看廟,所以我整個行程都安排在京都.

住的是對著京都站的京都新阪急酒店.這家酒店是老牌酒店,我選它為了不會有意外”驚喜”又方便.幸好結果也沒令我們失望.地點真的很方便,一過馬路就可有巴士或JR站了.

  

到埗第一日,搭JR去京都入住酒店.在伊勢丹11樓一家說食本地菜(地上種那些)的店食過晚飯就回酒店搞我張上網卡至半夜2點.

因為阿哥說想看廟,清水寺怎可不去呢?雖然它正在裝修,我們第2天都去了.不過媽媽行不了很多路,我去過3次了,所以只有我哥自己進去走,結果他30分鐘左右就出來了…

帶了媽媽回酒店睡覺,我和哥哥再去花見小路.晚上到拉麵小路吃拉麵.

我哥其實超級喜歡買”野”,所以他說他要看廟,我才不信.第3天我帶大隊去錦市場.那裡既有媽媽喜歡的街市又有哥哥喜歡的服飾,還有我喜歡的藥妝.本以為在那裡可以消磨一整天結果因為團員都喜歡早起,阿哥行路又超快,所以半天我們就行完了…

帶了媽回酒店,我和阿哥就去了聽說有最大棵銀杏樹的西本願寺.可惜那天天氣陰暗,日本的廟又喜歡黑色,所以感覺不佳.

是日晚餐在京都站地下街一家意大利餐廳食.

最後一日,阿哥見天氣好,拉了我去酒店附近的東本願寺.

幸好在那我們可以看到銀杏,都不枉此行.

這次因為去的時候是11月初,沒能看到很紅葉,只是在機場看到一些,聊勝於無

總結來說,4天裡3天好天氣,挺暖的,在街上走不會太凍.不過團員日日7點半已經準備好出門趕我起身,加上我哥走路超快又不用休息,這幾天對我來說實在辛苦過返工,我以後都係俾錢幫阿哥報團去旅行算了!

 

劇集 – 最好的我們

30453941425756693276

近期迷上了這劇.

其實這是一套網劇,可是質素很高,而且內容和傳統的電視劇沒差,所以我開始根本不知道是網劇.看來現在的網劇也越拍越認真了.

全劇24集,不長,說的是男女主角高中3年的生活.當中有友情,有荳蔻年華的初戀,有學業上的難題,也有都市家庭的故事.是一部很溫暖很陽光的青春片.男主角叫余淮,女主叫耿耿,兩人的名字合起來讀作耿耿於懷.我就是在網上看到這劇男主說到這一點的片段,覺得很有意思,才開始看下去的.不過不知道是什麼原因,網上都沒有完整版,所以到現在我都只是看了片斷.不過沒關係,有時這些片斷雖然不完整,可是最精華的地方.如果我看全劇反而可能因為裡面的枝節而減低了興趣也說不定.

戲裡的對白很佻皮活潑,很符合角色的年齡性格,但又很有意思.女主角的演員拍的時候已25歲了,可是因為身材嬌小,笑容甜美,一點都沒感覺在裝嫩.男主角當時18歲,根本就一學生,不過外形很好很陽光,絕對是校草那種,而且他的聲音我很喜歡.男女主角之間的交流也很自然,一點沒看出兩人其實差了7歲.希望他們有機會會再一起拍戲.其他的配角也演的出色(比起我們TVB那些愛回家的演員和故事…)。戲裡的鏡頭大都是逆光的,而且取景好像是青島,感覺很溫馨很陽光。配樂也很出色,故事節奏也很流暢,總之是不可多得的青春校園片,是可以在低落時翻出來重看的那種。

其實戲裡的內容我是沒有代入感的,他們經歷的軍訓,為考試不停做試卷,甚至初戀,我都沒經歷過.不過看到男女主角的高中生活還是使我回憶起自己的學生時代.我們學校不太”操”我們考試技巧,我們都是去補習班”操”的.初戀,奇怪的是我們當時都很單純,沒有一個人和同學”拍拖”,在校外有沒有,我就不知道了.和戲裡的學生生活比起來,我的學生時代真是太枯燥太沈悶了,可是我也同意我一生中最單純最開心的還是那些年.我自己覺得拍的最漂亮的相片也是那時拍的.相中的自己真是很暖很漂亮.我最近才知道其中一張我爸爸當年在外工作時都一直帶在身邊,可想而知那時的我是很可愛的.

連我這一和主角完全沒有共鳴的大媽,看了都能回想起自己的青春歲月,難怪別人說這戲(其實說的是原著)把回憶寫到了極致.

三遊高雄 – 第四天

呢日無咩做,主要係退房去機場.咁就寫下間酒店啦.

今次目的係睇演唱會,我係演唱會場地高雄巨蛋附近搵左間御宿商旅-明華館.呢間應該係當地連鎖店,房間唔錯,浴室仲有浴缸同花灑兩種.不過訂0既係市景房,結果拉開窗簾係另一間屋0既窗,所以4日我都無拉開過窗簾.我可能遲訂,雙人房無晒,訂左間4人房,六百頭一晚包4人早餐.呢日我細心睇張早餐券發覺原來”早餐”供應到1點,只係10點後唔係自助.酒店地下本身24小時供應咖啡,茶包,果汁,雪糕,爆谷.呢日我同媽咪正常時間食完自助早餐,12點退房再用埋2張餐券食左個”早餐”,係火腿加煎蛋,另外早上食剩的饅頭,豬肉包都可以食.我當中午飯食.

食完叫番琴日個女司機車我地去機場.報價NT$550,我還NT$500(因為我到個日只係坐左480).去到機場,再去Priority Pass候機室又食過.個度D裝修有少少土,食物選擇都算可以.可以叫鹵肉麵或飯,又有閞東煮食.

我今次係香港去左佢地新個間候機室,食物選擇同旁邊間差不多,麵食多左一種素食選擇,不過無支裝水,一正一負打和啦.

今次雖然飛行時間唔長,但係飛機餐唔係食包反而係正常飯餐,味道仲唔錯,驚喜.

   

 

三遊高雄-第三天

前一晚演唱會差不多11點先完,返酒店後又微信P傾下演唱會0既趣事,結果成1點先上床。第2日當然好遲先起到身,再諗當日0既行情。

本來想再坐文化公車,不過後來覺得無咩意思,就去酒店前台希望佢地可以介紹包車半日遊。酒店話唔可以介紹,俾張卡片叫我自己打去問。我買0既上網卡係唔可以打電話,問前台打電話要幾錢,又答到含含糊糊咁,好彩張卡片有微信,所以食完早餐就返房上微信聯繫問價。話4個鐘NT$1800,就約實係酒店等。結果來左個女司機。

我聽講有個郊區地方叫美濃,比較鄉下,就叫司機去美濃,再加一個魚市場(我上次包車去過一個觀光漁市場,媽咪買左的魚旦話好平又好食)。

美濃唔算好遠,大約40分鐘到司機帶我地去左一個客家文化村。裡面唔算好大,不過有紀念品賣,有飯食,有油紙遮DIY,都可以消磨下.我地中午飯都係個度食,叫左碗板條,加碟鹵水拼盤,加個菜.本來以為板條係咩新鮮野,原來係河粉,不過硬身的.反而個鹵味幾好味.因為晚黑要食自助餐,叫左少少野食,但媽咪都話好飽.

食完離開文化村,司機介紹附近有咖啡飲,即管去下啦.個地方係條村裡面,司機搵左好耐先到.個度主要賣淘器.我本身對淘器興趣不大,而且個度亦唔平,所以無幫襯.咖啡室係工作室外面一間小店.叫左杯咖啡自己飲,媽咪叫左杯紅棗茶.

飲完咖啡,司機話唔夠時間去漁市場,轉帶我地去一個黃昏市場.雖然話叫黃昏市場,但下午就開了.原來係市區0既.我上次同秘書長去台北買唔到文旦,就係市場買左4個NT$100.上次係台北水果市場買龍眼,核又細肉好實淨好食,所以又買左斤NT$120.當然媽咪買左的魚旦,可能因為市場係市區,無上次平,不過都平過香港,而且好味.司機一路搶住幫我地攞野,媽咪唔好意思,行左陣就叫返酒店.而且佢話太飽,唔食得落自助餐,無法唯有係酒店房打電話去取消訂位.晚飯係酒店附近食小籠包.味道一般,不過牆上寫0既字好有意思

食完,我又好掛住第一晚食台菜間舖對面0既仙草甜品.媽咪可能覺得累我食唔到自助餐過意唔去,陪堆我去食.碗野好好食,不過我地兩個相信係全場最老0既食客了.

 

 

 

三遊高雄-第二天

呢次高雄之旅重頭戲就係第二天晚的演唱會.日頭其實無安排.

我8點起身,去樓下滋滋油油食早餐.返房執拾下,就打的去打狗鐵道故事館坐文化公車.

我第一次去高雄時坐過哈馬星線(http://culturalbus.khcc.gov.tw/home03.aspx?ID=$3001&IDK=2&EXEC=L),是個種隨時上落,循環幾個景點的車.車上面仲有免費導遊講解每個景點.車費只要每人NT$50.今次打算帶媽媽坐坐,睇睇風景打發時間.結果打的錢比公車坐成日仲貴,坐左2百幾台幣一程.

去到打狗鐵道故事館,公車差不多夠鐘,我坐低等.期間不停俾的士佬兜生意,叫我地坐去西子灣,只要NT$90就得了.媽咪有些心動,我當然唔上當.我坐哈馬星只要NT$100兩個人,可以隨上隨落,去多好多地方.

等左一陣,有車.上車買票,個導遊”姐姐”好熱心,話我地知張票可以坐晒全部文化公車同埋市內1-3位數的公車.我留意睇都無見過多過3位數的公車,即係所有公車都坐得,好抵.本來打算先同媽咪坐一圈,再搵個景點落車慢慢睇.點知去到鼓山魚市場站,見時近中午,就同媽咪落車食晏.點知個度食冰就易,餐廳反而開門0既唔多.無辦法下,入左間韓國舖食(識我0既人就知我係幾無辦法下).叫左個冷麵同一個泡菜炒飯,味道好一般.

我地食飯個陣都觀察度,的公車都幾準時,簡簡單單食完,去返落車點等下一班車.係車站旁邊有幾間冰店,我見有間叫大碗公0既都幾多人食,就叫左碗紅豆棉花冰.NT$55.的冰真係好綿,媽咪都話正.食完冰,就見到公車來,又係同一個導遊姐姐.坐埋其他站,返到起點,全部人要落車.我同媽咪趁機參觀打狗鐵道故事館.呢個以前係火車調度站,而家已經無用了,變左一間火車博物館.放左幾架火車頭係館外,影下相都幾好架.館內都保留以前火車站0既陳設.

我跑出館外影火車頭個陣,媽咪留係館內吹冷氣等我.見到人地打印仔,佢又搵本簿仔印埋一份.仲識得跟住樣本搵印子號碼先印,真係叻.

本來想同佢返酒店休息下,再用張車票坐其他文化公車.不過後來變左返酒店上網.不知不覺已經到左食晚飯時間.因為我要睇演唱會,所以要早食.係酒店對面搵到間新新圓汕頭火鍋都幾多人,試下啦,先發現呢間野應該幾好,因為好快就全滿了.呢間店得一種湯底,火鍋料放係雪櫃,根據碟0既顏色計數.我地點左一碟推介0既豬肉,再加幾碟雪櫃攞0既料.都食得好飽.食完發現好多細佬係店外”畢”雪糕食,原來雪糕係免費架,仲有4隻味.呢餐食左8百幾台幣.

食完帶媽咪返酒店休息,我自己去睇演唱會.買0既係第2貴0既票,坐旁邊樓上座前排.高雄巨蛋比台北親民好多,第一排觀眾同個台近好多(唔知係咪我錯覺).不過高雄好多人捉偷影,台北好似無咩捉.

下次都係買第3貴個種票,坐兩邊高的,因為反正都睇唔到人,坐高的睇大電視容易的.

畢竟高雄講台語0既人多,當晚好多台語歌,但無好似台北咁有字幕,所以我大部份時間聽唔明.不過費生好落力,唱足3個鐘至完,台下叫安歌,佢又真係肯,結果當晚唱左3個幾鐘.唱到我部電話都無電.

三遊高雄-第一天

今年6月跟前秘書長去了一次覓食台灣及看演唱會之旅,意猶未盡,剛好9月在高雄又有演唱會看,正十五十六要不要去看,前秘書長通知我國泰有fanfares去高雄,稅前HK$890,日子剛好就那幾天,所以就訂了機票.這次還了媽媽陪我.

香港和高雄很近,我們12點多飛機,只要一個小時左右就到了。高雄機場離酒店也不遠,打的半個小時就到了.

雖然這次主要目的是看演唱會,但我出發前還是上網找了些食店.上次跟秘書長去台北吃台菜和自助餐,很好玩,所以這次也找這類餐廳.好彩酒店附近就有.到了酒店放好行李,就拉了媽媽早早去大八想看看自助餐有無位.結果無,媽媽又想試,就訂了星期天晚餐時段.大八無位,就轉去附近的台菜館阿榮海鮮鵝肉.

點了一條老闆推介的彭湖出產的魚,一碟高麗菜,一碟當地的什麼菜.送了2片西瓜.我點了支啤酒,埋單1千多台幣.

條魚真身是這樣的.有些彩虹紋.魚肉很嫩滑,很少骨,味道都幾鮮味,推介.

食完飯,我怕媽咪太勞累,同佢返酒店.然後我自己行去瑞豐夜市.呢個夜市係高雄都好出名,好大(感覺比六合夜市大)而且好多當地人都去.除左食野,仲有衣服飾物賣.夜市離酒店唔遠,2,3個街口就到,係路上有D黑.

可能年紀大了,夜市賣個D煎炸野我唔再有興趣,食左個鴨肉包,飲左杯木瓜奶茶我就無再食了.個度衣服鞋襪我都無打算買,本來想買頭飾,但係搵唔啱,快快行左一圈,我就返酒店了.

 

 

.

Previous Older Entries