三遊高雄 – 第四天

呢日無咩做,主要係退房去機場.咁就寫下間酒店啦.

今次目的係睇演唱會,我係演唱會場地高雄巨蛋附近搵左間御宿商旅-明華館.呢間應該係當地連鎖店,房間唔錯,浴室仲有浴缸同花灑兩種.不過訂0既係市景房,結果拉開窗簾係另一間屋0既窗,所以4日我都無拉開過窗簾.我可能遲訂,雙人房無晒,訂左間4人房,六百頭一晚包4人早餐.呢日我細心睇張早餐券發覺原來”早餐”供應到1點,只係10點後唔係自助.酒店地下本身24小時供應咖啡,茶包,果汁,雪糕,爆谷.呢日我同媽咪正常時間食完自助早餐,12點退房再用埋2張餐券食左個”早餐”,係火腿加煎蛋,另外早上食剩的饅頭,豬肉包都可以食.我當中午飯食.

食完叫番琴日個女司機車我地去機場.報價NT$550,我還NT$500(因為我到個日只係坐左480).去到機場,再去Priority Pass候機室又食過.個度D裝修有少少土,食物選擇都算可以.可以叫鹵肉麵或飯,又有閞東煮食.

我今次係香港去左佢地新個間候機室,食物選擇同旁邊間差不多,麵食多左一種素食選擇,不過無支裝水,一正一負打和啦.

今次雖然飛行時間唔長,但係飛機餐唔係食包反而係正常飯餐,味道仲唔錯,驚喜.

   

 

Advertisements

三遊高雄-第三天

前一晚演唱會差不多11點先完,返酒店後又微信P傾下演唱會0既趣事,結果成1點先上床。第2日當然好遲先起到身,再諗當日0既行情。

本來想再坐文化公車,不過後來覺得無咩意思,就去酒店前台希望佢地可以介紹包車半日遊。酒店話唔可以介紹,俾張卡片叫我自己打去問。我買0既上網卡係唔可以打電話,問前台打電話要幾錢,又答到含含糊糊咁,好彩張卡片有微信,所以食完早餐就返房上微信聯繫問價。話4個鐘NT$1800,就約實係酒店等。結果來左個女司機。

我聽講有個郊區地方叫美濃,比較鄉下,就叫司機去美濃,再加一個魚市場(我上次包車去過一個觀光漁市場,媽咪買左的魚旦話好平又好食)。

美濃唔算好遠,大約40分鐘到司機帶我地去左一個客家文化村。裡面唔算好大,不過有紀念品賣,有飯食,有油紙遮DIY,都可以消磨下.我地中午飯都係個度食,叫左碗板條,加碟鹵水拼盤,加個菜.本來以為板條係咩新鮮野,原來係河粉,不過硬身的.反而個鹵味幾好味.因為晚黑要食自助餐,叫左少少野食,但媽咪都話好飽.

食完離開文化村,司機介紹附近有咖啡飲,即管去下啦.個地方係條村裡面,司機搵左好耐先到.個度主要賣淘器.我本身對淘器興趣不大,而且個度亦唔平,所以無幫襯.咖啡室係工作室外面一間小店.叫左杯咖啡自己飲,媽咪叫左杯紅棗茶.

飲完咖啡,司機話唔夠時間去漁市場,轉帶我地去一個黃昏市場.雖然話叫黃昏市場,但下午就開了.原來係市區0既.我上次同秘書長去台北買唔到文旦,就係市場買左4個NT$100.上次係台北水果市場買龍眼,核又細肉好實淨好食,所以又買左斤NT$120.當然媽咪買左的魚旦,可能因為市場係市區,無上次平,不過都平過香港,而且好味.司機一路搶住幫我地攞野,媽咪唔好意思,行左陣就叫返酒店.而且佢話太飽,唔食得落自助餐,無法唯有係酒店房打電話去取消訂位.晚飯係酒店附近食小籠包.味道一般,不過牆上寫0既字好有意思

食完,我又好掛住第一晚食台菜間舖對面0既仙草甜品.媽咪可能覺得累我食唔到自助餐過意唔去,陪堆我去食.碗野好好食,不過我地兩個相信係全場最老0既食客了.

 

 

 

三遊高雄-第二天

呢次高雄之旅重頭戲就係第二天晚的演唱會.日頭其實無安排.

我8點起身,去樓下滋滋油油食早餐.返房執拾下,就打的去打狗鐵道故事館坐文化公車.

我第一次去高雄時坐過哈馬星線(http://culturalbus.khcc.gov.tw/home03.aspx?ID=$3001&IDK=2&EXEC=L),是個種隨時上落,循環幾個景點的車.車上面仲有免費導遊講解每個景點.車費只要每人NT$50.今次打算帶媽媽坐坐,睇睇風景打發時間.結果打的錢比公車坐成日仲貴,坐左2百幾台幣一程.

去到打狗鐵道故事館,公車差不多夠鐘,我坐低等.期間不停俾的士佬兜生意,叫我地坐去西子灣,只要NT$90就得了.媽咪有些心動,我當然唔上當.我坐哈馬星只要NT$100兩個人,可以隨上隨落,去多好多地方.

等左一陣,有車.上車買票,個導遊”姐姐”好熱心,話我地知張票可以坐晒全部文化公車同埋市內1-3位數的公車.我留意睇都無見過多過3位數的公車,即係所有公車都坐得,好抵.本來打算先同媽咪坐一圈,再搵個景點落車慢慢睇.點知去到鼓山魚市場站,見時近中午,就同媽咪落車食晏.點知個度食冰就易,餐廳反而開門0既唔多.無辦法下,入左間韓國舖食(識我0既人就知我係幾無辦法下).叫左個冷麵同一個泡菜炒飯,味道好一般.

我地食飯個陣都觀察度,的公車都幾準時,簡簡單單食完,去返落車點等下一班車.係車站旁邊有幾間冰店,我見有間叫大碗公0既都幾多人食,就叫左碗紅豆棉花冰.NT$55.的冰真係好綿,媽咪都話正.食完冰,就見到公車來,又係同一個導遊姐姐.坐埋其他站,返到起點,全部人要落車.我同媽咪趁機參觀打狗鐵道故事館.呢個以前係火車調度站,而家已經無用了,變左一間火車博物館.放左幾架火車頭係館外,影下相都幾好架.館內都保留以前火車站0既陳設.

我跑出館外影火車頭個陣,媽咪留係館內吹冷氣等我.見到人地打印仔,佢又搵本簿仔印埋一份.仲識得跟住樣本搵印子號碼先印,真係叻.

本來想同佢返酒店休息下,再用張車票坐其他文化公車.不過後來變左返酒店上網.不知不覺已經到左食晚飯時間.因為我要睇演唱會,所以要早食.係酒店對面搵到間新新圓汕頭火鍋都幾多人,試下啦,先發現呢間野應該幾好,因為好快就全滿了.呢間店得一種湯底,火鍋料放係雪櫃,根據碟0既顏色計數.我地點左一碟推介0既豬肉,再加幾碟雪櫃攞0既料.都食得好飽.食完發現好多細佬係店外”畢”雪糕食,原來雪糕係免費架,仲有4隻味.呢餐食左8百幾台幣.

食完帶媽咪返酒店休息,我自己去睇演唱會.買0既係第2貴0既票,坐旁邊樓上座前排.高雄巨蛋比台北親民好多,第一排觀眾同個台近好多(唔知係咪我錯覺).不過高雄好多人捉偷影,台北好似無咩捉.

下次都係買第3貴個種票,坐兩邊高的,因為反正都睇唔到人,坐高的睇大電視容易的.

畢竟高雄講台語0既人多,當晚好多台語歌,但無好似台北咁有字幕,所以我大部份時間聽唔明.不過費生好落力,唱足3個鐘至完,台下叫安歌,佢又真係肯,結果當晚唱左3個幾鐘.唱到我部電話都無電.

三遊高雄-第一天

今年6月跟前秘書長去了一次覓食台灣及看演唱會之旅,意猶未盡,剛好9月在高雄又有演唱會看,正十五十六要不要去看,前秘書長通知我國泰有fanfares去高雄,稅前HK$890,日子剛好就那幾天,所以就訂了機票.這次還了媽媽陪我.

香港和高雄很近,我們12點多飛機,只要一個小時左右就到了。高雄機場離酒店也不遠,打的半個小時就到了.

雖然這次主要目的是看演唱會,但我出發前還是上網找了些食店.上次跟秘書長去台北吃台菜和自助餐,很好玩,所以這次也找這類餐廳.好彩酒店附近就有.到了酒店放好行李,就拉了媽媽早早去大八想看看自助餐有無位.結果無,媽媽又想試,就訂了星期天晚餐時段.大八無位,就轉去附近的台菜館阿榮海鮮鵝肉.

點了一條老闆推介的彭湖出產的魚,一碟高麗菜,一碟當地的什麼菜.送了2片西瓜.我點了支啤酒,埋單1千多台幣.

條魚真身是這樣的.有些彩虹紋.魚肉很嫩滑,很少骨,味道都幾鮮味,推介.

食完飯,我怕媽咪太勞累,同佢返酒店.然後我自己行去瑞豐夜市.呢個夜市係高雄都好出名,好大(感覺比六合夜市大)而且好多當地人都去.除左食野,仲有衣服飾物賣.夜市離酒店唔遠,2,3個街口就到,係路上有D黑.

可能年紀大了,夜市賣個D煎炸野我唔再有興趣,食左個鴨肉包,飲左杯木瓜奶茶我就無再食了.個度衣服鞋襪我都無打算買,本來想買頭飾,但係搵唔啱,快快行左一圈,我就返酒店了.

 

 

.

2017泰遊行之買

去泰國買野係必做的.我地去左幾度買野

Central World有蝴蝶袋專門店.不過我地無朋友特別要送,所以無買(其實係後來無時間去).另外Central World換錢比機場抵好多.機場換3.95,Central World有4.3.Big C個邊都有得換,大約4.2.

Siam Paragon超市聽講有折蟹肉,不過我地可能去得夜,見唔到.不過我家姐勁鍾意佢地個度D果仁舖面米通,79-99Bhatt一包,佢買左成10包.我縑佢熱氣買左2包俾同事食.Siam好似有好多野買,下次再去,可能要住Siam.

翟道翟JJ Market好大0既露天市場.我買左100Bhatt有4樽0既香油(經驗係唔好插晒佢俾0既樹葉等佢吸得慢D),送俾女仔,細細份又香噴噴.泰式銀包仔(細0既10Bhatt,大0既有隻象0既我地講完價80Bhatt有4個),我買左一堆放係屋企等阿媽派俾人,結果佢看更又派,對面個印印又派,派得好開心.大象手袋,800Bhatt 2個,阿媽家姐一人一個.新鮮芒果干,140Bhatt一包.小老闆紫菜,100Bhatt一包,買3送1.藥品,我有買不過好似Big C個層間藥店平D.我買左條繡花手繪半截裙,講完價320Bhatt,真係抵,花園街都唔得.我地又係度試腳底按摩,200Bhatt20分鐘,未做過平平地試下自己鍾唔鍾意先.做完隻腳真係輕左.呢度可能早D去好D,人少D又可以講下價.

Big C買公仔麵,魚露,生果小老闆,百力支都好平.我今次無食到青咖哩買左包青咖哩公仔麵,50Bhatt6包,麵細D不過青咖哩好味.我買左盒花花型0既餅(?)俾F做手信,好彩佢話未見過.

Big C同層有間藥店,價錢都幾平.不過我真係唔知買咩藥,虎標平時都無用,買左D蜈蚣丸話醫咳(家姐食左話無效),搽肌肉痛0既膏,阿媽話唔錯.蚊膏35Bhatt一盒.

我地酒店對面有間迷你Boots.我無搵到有咩買,只係買左盒粉餅.買佢因為我剛好要買粉餅佢又有特價108Bhatt美白版(另有自然版不過賣晒),係機場Boots賣正價425Bhatt.

係水門市場附近有間Festival Mall,個度有2個MALL,其中一間D野精緻D,我同家姐買左條連身裙,700Bhatt兩條.仲搵到件無袖衫,家姐激讚話返屋又得去街又得,不過要350Bhatt無價講,我最後無買到.

我地今次換左2500港紙,洗剩差不多2000Bhatt.另外Uber同Big C係用信用卡0既

 

 

 

 

 

2017泰遊行之行

今次出行因為媽咪唔方便上落,大部份都係行路同坐的士.

一出機場聽左達人教坐的士去酒店,講好價就上.機場的士站有分短途定正常或大車,難度系數唔高.不過插曲一係由出境大堂到地下搭的士個段路有一個好似過山車咁0既扶手電梯,我阿媽搭到猛話驚.插曲二的士佬可能口音問題我聽到佢話400Bhatt但落車佢話係500,達人話500Bhatt或以下都屬正常所以照俾.

另一達人教話曼谷搭Uber好平,我為左方便搵路,出發前搵F係旺角金魚街買左張上網卡,港紙40可以用7日4G網絡(首2GB係4G網速,之後慢D).我去翟道翟個程試下叫Uber,坐左百零Bhatt,大約廿幾蚊港紙,勁平.返酒店因為怕唔知點約上車地點,我地搭普通的士300Bhatt.不過臨走前一晚臨時想去Waterfront夜市,又膽粗粗叫Uber去,來左架香車美人.架車真係香噴噴架,個司機亦都真係靚女,講野又溫柔.不過唔知係佢唔識路定係撞正塞車行邊都塞,坐左成個鐘都未去到,後來個段我同家姐計住時,個紅燈9分鐘先轉一次燈,每次過4架車左右(我地後來懷疑係因為要讓D電單車行咁D先可以行).坐到成7點幾都未到,我地決定叫佢返Big C放低我地.呢程就冤枉咯,成4百幾Bhatt,慘在去唔到嘛(我而家都唔敢話俾屋企人聽幾錢).所以結論係Uber確係平,不過司機好似唔係好識路,而且溝通有困難(車我地去翟道翟個位全程無同我講野,美人因為同車時間長,靠Google translate溝通).

的士感覺上專業D,講好價,佢會用最快路線送你到目的地,而且我係翟道翟返酒店個司機英文好好,仲話我地知佢一日要俾700Bhatt俾公司,我地仲笑佢走2轉我地呢D就差唔多可以返屋企休息.

去到曼谷又點可以唔搭Tutu.我同家姐第一晚放低媽咪係酒店休息去Siam Paragon想買折好0既蟹肉。結果試食手信同買外賣耐左,為怕媽咪肚餓我地搭Tutu。不過無經驗未講價就上左車,結果個程5分鐘0既Tutu要成200Bhatt.

至於行路,不得不又讚下我地間酒店位置好.行去水門都可以行天橋去.(不過我地無去到水門市場,轉左去一間專賣衫既商場.個度的衫都唔算好貴,我同家姐都買左條裙

2017泰遊行之食

我本身都幾鍾意食泰國野,聽講曼谷食野又平又好食,本來對呢次期望好高,結果有些失望.主要原因我相信係因為我阿媽同家姐.

首先我阿媽唔行得,成日話唔想出去食叫我地買返酒店俾佢食,變左選擇少左好多.而且唔知點解去到泰國佢話要食濕濕地但唔要魚旦河…搞到我地差唔多要買韓國或者日本野佢食.

跟住我家姐話自己有糖尿,食咩都話甜,搞到好多時D食物都係我食晒,所以後來都唔敢多叫.

加上唔知係咪我地酒店近四面佛,係遊客區,食野唔係想像中平.我地第一日去Central World一間泰菜館食,一個椰青都要95Bhatt,差不多無食咩都要400Bhatt.係Central World外面小食檔,我阿媽睇到有榴槤話要食,我家姐要左一份好新鮮0既金枕頭,成百蚊港銀,味道係唔錯不過一D都唔平咯.

後來我地發現Big C樓上有美食廣場,50Bhatt有交易,而且咁近我阿媽都敢行去,所以日日都係個度食…個度食野要先買張卡,金額由你決定,用唔完可以退番俾你,無手續費,不過要俾現金.我有次放左400Bhatt諗住實有淨,結果要補錢.

雖然我都堅持食左豬手飯,冬陰功湯河,芒果糯米飯(呢樣係我家姐話要食,結果一如所料大部份落左我肚),椰子雪糕.不過飲唔到泰式奶茶,食唔到青咖哩,又無食過海鮮,沮喪…

Previous Older Entries