自你去後

那天看了港佬悼念亡父的博文,終於鼓起勇氣也悼念悼念我自己的父親。

爸爸係舊年過身的。

當時發生的很突然。雖然爸爸過身已將近一年,但是我仍清楚記得0個日一早俾媽咪叫醒然後係廁所睇到爸爸係地下。當時第一感覺好唔真實,好似自己仲係發緊夢,跟住係手足無措,六神無主。結果爸爸送到去醫院,醫生瞄左唔知有無1分鐘就同我講爸爸走左。頓時覺得天崩地裂。之后日日想起爸爸生前種種,好後悔從來無好好孝順佢,日日以淚洗面。即使佢離開左就快一年了,我仍然成日諗起佢生前成日行來我房門口問我要唔要飲水,問我有無咩好戲介紹佢睇,諗到係街都喊起來。以前我淨係覺得佢煩,同佢講多句都唔想,而家真係好後悔當初無好好珍惜同佢相處既時間。而家就算你叫我攞自己條命換佢多幾分鐘相聚我都二話不說應承,可惜佢離開咁耐都無夢到過佢,可能佢嬲我不孝,因為佢生前最錫就係我,但係我對佢好差。

佢走左後我同阿媽去過佢以前係台灣做野既地方。好後悔無早的去。因為去左我先知當初爸爸為左供我讀大學離鄉別井打工係幾寂寞同辛苦,好彩我大學一畢業阿媽就叫佢唔好去返香港團聚,我地先可以住番埋一齊。

有的野係要失去先識珍惜,可惜往往失去既都係我地好珍貴同無可替代既野。我而家好深刻體會到咩叫「子欲養而親不在」,學識珍惜眼前擁有既一切。慢慢意識到好多我以前一直以為永遠都會係度既野係會有一日突然消失的無影無蹤0既,包括我爸爸。我其實早就心知佢已經年紀唔輕,有日會"走",自己都不停幫自己做心理準備,但係事情一旦發生,所有既心理準備都無用,個心都係咁痛,眼淚都係咁不受控制咁流落來。

由佢走左個時開始,我戒左食牛肉來紀念佢,因為爸爸生前話的牛又要耕田又俾人食好慘,我以前覺得爸爸傻,而家我都跟佢唔食幫佢繼續佢認為啱既野。

Advertisements